طريقه عمل البيتزا

هنبتدي بإيه

دلوقتي احنا دخلنا المطبخ وهنبدأ نجهز طلبات البيتزا وأول حاجة هتجهزيها هي عجينة البيتزا، لأنها محتاجة وقت علشان العجينة تخمر، وبيني وبينك كده فيه أكتر من طريقة لعمل عجينة البيتزا يعني فيه ناس بتعملها ببيض ولبن وفيه ناس بتعملها من غير بيض ولا لبن، واحنا هنقولك على الطريقتين واللي يعجبك فيهم اعمليه..

العجينة على طريقة نابولي



المقادير:

• 3 أكواب دقيق
• 2 ملعقة خميرة بيرة
• 2/1ملعقة صغيرة ملح
• كوب ماء دافئ
• 3معالق كبيرة زيت ذرة

الطريقة:

1- اخلطي كوب ونصف دقيق مع الخميرة والملح وبعد كده ضيفي الميه والزيت، واضربيهم كلهم بمضرب البيض الكهربائي على سرعة عالية لمدة 3 دقائق.

2- ضيفي باقي الدقيق إلى الخليط السابق وقلبيه باستخدام ملعقة خشبية.

3- انقلي العجينة على رخامة المطبخ أو على لوح خشبي وابدئي في عجنها بإيدك لغاية ما تلاقيها بقت طرية ومطاطة وسهلة التشكيل على شكل دوائر كبيرة.

4- انقلي العجينة إلى الطبق البلاستيك أو طبق زجاجي كبير وادهنيها بالزيت وغطيها بقطعة قماش وسيبيها في مكان دافي لمدة ساعتين علشان تخمر وحجمها يزيد...

العجينة على طريقة ملاينو




المقادير:

• 2 كوب دقيق
• 2 بيضة
• 2 معلقة زبدة
• كوب لبن
• ذرة ملح وفلفل
• 2 معلقة خميرة بيرة
• 2/1معلقة سكر

الطريقة:

1- اخلطي الخميرة مع السكر.

2- هاتي طبق زجاج أو بلاستيك كبير وحطي فيه السمنة واضربيها بالمضرب الكهربائي وبعد كده ضيفي إليها باقي المقادير والخميرة والسكر واضربيهم مع بعض بالمضرب هتلاقي إن العجينة بقت جامدة شيلي المضرب واعجني العجينة بإيدك لغاية ما تلاقيها بقت طرية ومطاطة غطيها وسيبيها لمدة 3 ساعات عشان تخمر.

بس يا ستي دول كانوا أشهر طريقتين لعمل عجينة البيتزا في إيطاليا وحبيت أقولهم في الأول لأن زي ما إنت عارفة إن أهم حاجة في البيتزا هي العجينة وعلى فكرة العجينة دي هتستخدميها في عمل أي نوع إنت عايزاه من أنواع البيتزا..

وفيه حاجة تانية مهمة لازم تكوني عارفاها علشان هتحتاجيها في عمل كل نوع من أنواع البيتزا وهي..

صلصة البيتزا




المقادير:

• 4 حبات طماطم مقشرة ومقطعة مكعبات صغيرة
• 4 ملاعق كبيرة معجون طماطم
• 2 ملعقة كبيرة زيت ذرة
• 1 ملعقة صغيرة زعتر جاف ومطحون
• 1 ملعقة صغيرة أوريجانو، أو نعناع، جاف ومطحون
• 1 ملعقة كبيرة ملح وفلفل

الطريقة:

1. سخني الزيت في طاسة على نار هادية، وبعد كده ضيفي الطماطم ومعجون الطماطم والزعتر والأوريجانو أو النعناع و4/3 كوب ماء وسيبي الخليط على النار لمدة نص ساعة علشان يتسبك...

بعد ما تلاقيه اتسبّك أو بقى تقيل شيليه من على البوتجاز واستخدميه في عمل البيتزا زي ما قلنا.
وبكده نكون خلصنا طريقه عمل العجينه